මා සහ මාගේ අම්මාට, ලොකු අම්මාගේ (මගේ අම්මාගේ සහෝදරිය) අනුග්‍රහය යටතේ 2019 අගෝස්තු 10 සිට අගෝස්තු 18 දක්වා රුසියාවේ සාන්ත පිතර්ස්බර්ග් නගරය සහ මොස්කව් නුවර, Jetwing travels සහ Grand Rus Tours ආයතනය අනුබද්ධව සංචාරයක යෙදීමට අවස්ථාව ලැබුණි. එම ගමනේදී මට මෙන්ම මාගේ අම්මාටද බොහෝ අත්දැකීම් ලැබීමට හැකියාව ලැබුණි.
මා තුළ සමාජවාදයට මෙන්ම රුසියානු සාහිත්‍යයට පැවැති උනන්දුව නිසා මෙම ගමන තවතවත් මගේ ජීවන අත්දැකීම් වලට වැදගත් වේ.
මාගේ පවුලේ පුස්තකාලයේ රුසියානු සාහිත්‍යයෙන් සිංහල බසට කරන ලද පරිවර්තන පොත් විශාල ප්‍රමාණයක් පැවැතියද මා කියවා තිබුනේ පොත් කිහිපයක් පමණි. එනමුත් රුසියානු මිනිසාගේ විඥාණයේ ක්‍රියාකාරිත්වය ඒ හරහා අල්ප වශයෙන් හෝ දැනගැනීමට මට හැකියාවක් ලැබුණි.
කාල් මාර්ක්ස් (1818 - 1883) විසින් හඳුන්වා දුන් මර්ක්ස්වාදය යථාර්තයක් බවට පත්වන්නේ ව්ලදමීර් ලෙනින් (1870 - 1924) ගේ ශ්‍රේෂ්ඨ ඔක්තෝබර් විප්ලවය (1917) සමගයි. මෙය සිදුවන්නේද රුසියාවෙයි.
එමනිසා ලෝකයේ මාර්ක්ස්වාදය හරහා සමාජවාදය බිහිවිය.
මෙම හේතුව මත රුසියාව වෙත ගමන් කිරීම එක්තරා විදිහක නැවුම් මෙන්ම මා ලැබූ මාගේ පෞද්ගලික දෘෂ්ටිවාදයට බලපෑම් එල්ලකරන ලද ගමනකි.
රුසියාවෙන් පැමිණ මාස 9කට පසුව රොහාන් ඩිරෙක්ස් නම් ගෝලීය ශ්‍රී ලාංකික සංචාරකයාගේ මෙම කෘතිය කියවීමට ලැබීම එක්තරා ආකාරයකට මා දුටු රුසියාව පිලිබඳ නව මානයක් විවෘත කළේය.
රොහාන් ඩිරෙක්ස් ගේ 'මහද්වීපයක තනි වුණෙමි' කෘතිය හරහා නුතන රුසියාව හා සෝවියට් දේශය පැවැති අර්බුධ මෙන්ම ජයග්‍රහණද විවිධ රටේ ඓතිහාසික මෙන්ම සංචරක ආකර්ෂණය දිනාගත් ස්ථාන හරහා මතුකිරීමට කතුවරයා සමත් වීම වැදගත් වේ. මාගේ සංචාරයේදී ඔහුගේ ග්‍රන්ථයේ විස්තරයට ලක්කෙරෙන 'පිටර්හෝෆ්' මාළිගයට පමණක් යෑමට හැකි විය.
මෙම ග්‍රන්ථය හරහා නුතන නව ලිබරල්වාදී රුසියාව හමුවේ අර්බුදයට ලක්ව ඇති සමාජවාදයත්, ජෝසෆ් ස්ටාලින්ගේ කෘරතර පාලන ක්‍රමය හරහා බිහිවූ මහා දැවැන්ත ආර්ථික වර්ධනයත්, එහි ප්‍රතිවිපාකත්, රුසියාවේ උත්තර ද්‍රවයට ආසන්න ප්‍රදේශවල ඇති කටුක දිවිපෙවතත් චායාරුප සමඟ බෙදාහදාගැනීමට කතුවරයා සමත් වී ඇත.
රුසියාව ගැන උනන්දු පුද්ගලයින් විසින් අනිවාර්යයෙන්ම කියවිය යුතු සංචාරක කෘතියකි.
රොහාන් ඩිරෙක්ස් යනු "සංචාර" ලෙස සිරස රූපවාහිනී නාලිකාවේ වැඩසටහනක් සහ අන්තර්ජාලයේ වෙබ්අඩවියක් පවත්වාගෙන යන ශ්‍රී ලාංකිකයෙකි.
No comments:
Post a Comment